MANILA, Philippines — Iniulat ng Philippine Navy na 19 Chinese People’s Liberation Army Navy (PLAN) warships ang namonitor sa West Philippine Sea sa buong Nobyembre 2025.
“Monitored also was a total of 19 different PLA-N warships across various maritime zones of the country,” ani Rear Admiral Roy Vincent Trinidad, tagapagsalita ng Philippine Navy. Dagdag niya, ipinapakita ng monitoring ang patuloy na maritime domain awareness at pangangalaga sa teritoryo at soberanya ng bansa.
Ulat ng Navy, anim na PLAN ships ang nakita malapit sa Bajo de Masinloc (Scarborough Shoal), Ayungin Shoal, at Escoda Shoal, habang 24 China Coast Guard vessels naman sa parehong lugar at sa paligid ng Pagasa Island. Sa kabuuan, 14,972 barko ang namonitor sa buong kapuluan noong Nobyembre, kabilang ang 12,450 dayuhan at 2,522 lokal.
Binigyang-diin ni Trinidad na nananatiling determinado ang AFP na ipatupad ang international law at protektahan ang pambansang interes sa mga pangunahing maritime areas. Inaangkin ng China ang halos buong South China Sea, na tinutukoy ng Pilipinas bilang West Philippine Sea. Dave Baluyot
