MANILA, Philippines – Bahagyang bumilis ang galaw ng Tropical Depression Wilma habang kumikilos ito pa-kanluran timog-kanluran sa Philippine Sea, kaya itinaas ng PAGASA ang Signal No. 1 sa 18 lugar.
Ayon sa pinakahuling bulletin, ang sentro ng bagyo ay nasa 245 km silangan ng Borongan City, Eastern Samar, taglay ang lakas-hangin na 45 km/h at pagbugsong hanggang 55 km/h. Kumikilos ito sa bilis na 20 km/h, at ang malalakas na hangin ay umaabot hanggang 220 km mula sa gitna.
Nasa ilalim ng Signal No. 1 ang bahagi ng mainland Masbate (Cataingan, Pio V. Corpuz, Esperanza, Placer, Cawayan, Palanas, Dimasalang); Northern Samar; Eastern Samar; Samar; Biliran; Leyte; Southern Leyte; hilaga at gitnang Cebu kabilang ang Bantayan at Camotes Islands; Bohol; hilaga at silangang Negros Occidental; hilagang Negros Oriental; silangang Iloilo; silangang Capiz; Surigao del Norte kasama ang Siargao at Bucas Grande Islands; Dinagat Islands; hilagang Surigao del Sur; hilagang Agusan del Norte; at Camiguin.
Inaasahang aabot sa 100–200 mm ang ulan sa Northern Samar, Eastern Samar, Samar, Biliran, Leyte, at Southern Leyte, habang 50–100 mm naman sa Cebu, Bohol, Negros Oriental, Negros Occidental, Siquijor, Guimaras, Iloilo, Capiz, Surigao del Norte, Dinagat Islands, Agusan del Norte, Misamis Oriental, Camiguin, Lanao del Norte, at Misamis Occidental.
Magdadala rin ang Amihan ng malalakas hanggang gale-force na bugso ng hangin sa malaking bahagi ng Luzon at Visayas. Naka-Gale Warning din sa hilaga at kanlurang baybayin ng Northern Luzon at silangang baybayin ng Luzon at Visayas.
“Wilma is forecast to move west southwestward until tomorrow (06 December) before turning generally westward for the remaining forecast period,” ayon sa PAGASA.
Posibleng mag-landfall o dumaan malapit sa Eastern Visayas o Dinagat Islands si Wilma sa pagitan ng Biyernes ng gabi at Sabado ng umaga bago tumawid sa Visayas hanggang Linggo. Lalabas ito sa Sulu Sea at posibleng dumaan sa hilagang Palawan pagsapit ng Lunes ng umaga.
“WILMA will slightly intensify before landfall but will likely remain as a tropical depression throughout the forecast period. Further intensification is possible once it emerges over the West Philippine Sea.” RNT
