MANILA, Philippines — Inutos ng Court of Appeals ang pag-freeze sa mga ari-arian nina Benguet Rep. Eric Yap, ACT-CIS Party-list Rep. Edvic Yap, at Silverwolves Construction Corporation, na diumano’y konektado sa anomalya sa flood control projects sa La Union, ayon kay Pangulong Ferdinand Marcos Jr. noong Martes.
Sa isang video report, sinabi ni Marcos na saklaw ng freeze ang mga bank account, properties, at aircraft.
“The freeze order covers the accounts and properties of Silverwolves Construction Corporation and Sky Yard Aviation Corporation, as well as the personal accounts and assets of the individuals being investigated — including Congressman Eric Yap and Edvic Yap,” sabi niya sa Filipino.
Ibinunyag ni Marcos na higit P16 bilyon ang pumasok sa transaksyon ng Silverwolves mula 2022 hanggang 2025, karamihan ay kaugnay ng mga flood-control projects ng Department of Public Works and Highways (DPWH).
Umabot sa 280 bank account, 22 insurance policy, tatlong securities account, at walong aircraft—kabilang ang mga eroplano at isang helicopter na konektado sa Sky Yard Aviation—ang na-freeze.
“Para sa mga Pilipinong paulit-ulit nakararanas ng baha, nawawala ang kanilang mga tahanan at kabuhayan, ang pondong para sa inyo ay hindi na maaaring nakawin, at ang katarungan ay hindi madaling maiiwasan,” ani Marcos.
Noong Oktubre, tinukoy ni Ombudsman Jesus Crispin Remulla si Eric Yap bilang “person of interest” sa reklamo ng DPWH kaugnay sa kontrobersyal na flood control projects sa La Union.
Maagang naghain ng malversation complaints laban sa DPWH officials, Silverwolves Construction Corporation, at St. Timothy Corporation si Public Works Secretary Vince Dizon. Sinabi rin ni Remulla na si Yap ang beneficial owner ng Silverwolves Construction Corporation.
Iginiit ni Yap na wala siyang kinalaman sa anumang kickback scheme at hindi niya inaprubahan ang anumang pag-deliver ng pera kaugnay sa mga proyekto. Ito ay kasunod ng pahayag ng isang dating security consultant ng umalis na Ako Bicol Party-list Rep. Zaldy Co na dinala ni Yap ang 46 na maleta ng pera sa tahanan ni Co sa Pasig City. RNT
