MANILA, Philippines – Humiling si Davao City Rep. Paolo “Pulong” Duterte ng travel clearance kay House Speaker Faustino “Bojie” Dy III para sa dalawang buwang paglalakbay mula Disyembre 15 hanggang Pebrero 20, 2026, na sasaklaw sa hindi bababa sa 16 na bansa.
Sinabi ni Duterte na ang lahat ng gastusin sa biyahe ay mula sa kanyang personal na pondo.
Humiling din siya ng pahintulot na makadalo sa mga plenary sessions nang malayuan habang nasa ibang bansa.
“In addition, this is also to seek your kind indulgence in allowing this Representation to attend the scheduled plenary sessions and meetings virtually during the aforementioned dates,” ani Duterte.
Si Duterte, anak ng dating Pangulong Rodrigo Duterte, ay dati nang pinahintulutang bumiyahe sa parehong mga destinasyon, kabilang ang Hong Kong, China, Malaysia, Indonesia, South Korea, Japan, Vietnam, Cambodia, Estados Unidos, Australia, United Kingdom, Netherlands, Germany, France, Belgium, Italy, at Singapore. RNT
