MANILA, Philippines – Hiniling ni Senador Francis “Kiko” Pangilinan sa Department of Agriculture (DA) at National Irrigation Authority (NIA) ang detalyadong paglalaan ng P8 bilyong halaga para sa pagpapatayo ng farm-to-market road (FMR) projects na hinihingi ng ahensiya.
Sa panayam, sinabi ni Pangilinan na hindi siya sumasang-ayon sa naturang panukalang batas hangga’t hindi naibibigay ang lahat ng detalye ng FMR projects upang masuri at matukoy ang lugar at sukat ng itatayong lansangan sa kanayunan.
Lumitaw ito sa isinagawang bicameral conference committee dahil nadoble ang 2026 budget para sa FMR projects tungo sa P33 billion. Ngunit sinabi ni Pangilinan—chairman ng Senate Committee on Agriculture, Food, and Agrarian Reform—na idinepensa ng Senado ang pondo ng DA na natukoy ngunit tinabla ang P8 bilyon sa proyekto dahil walang espisipikong detalye.
Ayon sa kanya, ang DA sa pamamagitan ng NIA ang magpapatupad ng proyekto.
“Di ba ang Senate version P16B?” tanong niya, na tumutukoy sa Senate-approved FMR budget. “Tapos sa bicam, hiningi natin na magkaroon ng submission doon sa P33 billion na minumungkahi, so sinubmit, pina-process namin. Tapos habang pina-process namin, mayroon kaming na-identify na kulang na actually P8 billion.”
“Initially, walang specifics, so tutal hindi pa naman nag-close ang bicam, so we will raise this in the bicam and we want coordinates. We want geo-tagging. We want itemized, line by line items of each contract, or each project. Kasi hindi pwe-pwede yung lump sum. Di kami papayag sa lump sum,” giit niya.
Miyembro si Pangilinan bilang vice chairman ng subcommittee ng Senate Committee on Finance at miyembro ng bicameral conference committee.
Sinabi pa ni Pangilinan na kanyang isusulong ang rekonsiderasyon sa pag-apruba sa P33 bilyon maliban kung may itemized geo-tagged coordinates sa FMR projects sa naturang pondo.
Naunang pinuna ni Pangilinan ang paggamit ng lump sum sa panukalang badyet para sa FMR dahil kailangan tukuyin ang eksaktong coordinates ng bawat proyekto.
Upang matiyak na corruption- at abuse-free ang pondo, inihain ni Pangilinan ang transparency mechanism at digital governance initiatives sa DA at NIA.
“Among these is a public online dashboard for irrigation projects, where timeline, status, finances (obligated/disbursed/source of funds), awarded contracts, contractors, and geo-tagged photos taken at key stages (start, mid, completion) will be displayed,” ayon kay Pangilinan.
