MANILA, Philippines — Itinanggi ng abogado ni dating Ako-Bicol Representative Elizaldy “Zaldy” Co ang pahayag ni Interior Secretary Jonvic Remulla na ginamit umano ni Co ang kanyang bahay sa Forbes Park upang itago ang cash mula sa umano’y ill-gotten wealth at naipon ang bilyon-bilyong halaga sa cryptocurrency sa abroad.
Ayon kay lawyer Ruy Rondain, pawang “fabrications” o gawa-gawa ang sinasabi ni Remulla at hinamon niya ito na tukuyin ang source ng impormasyon tungkol sa P5 bilyong bitcoin ni Co at sa apat hanggang limang basement levels sa mansion nito.
“Even if he does not name that alleged source, Secretary Remulla can keep any bitcoin he can find in Rep. Co’s name, in any amount,” dagdag ni Rondain. “Neither the existing building nor the construction plans supports his claim.”
Kinumpirma ni Rondain na may bahay si Co sa Forbes Park ngunit ang basement ay “split-type, strictly for vehicles” at idinisenyo lamang upang masulit ang buildable area alinsunod sa regulasyon ng village.
“The claim that the basement is so designed to store cash because ‘fire moves upward’ is pure speculation,” dagdag niya.
Si Co, na kasalukuyang nasa exile sa hindi isiniwalat na bansa, ay nagbitiw mula sa House of Representatives noong Setyembre matapos ma-tap ng kanyang kompanyang Sunwest Corp. sa umano’y ghost at substandard flood control projects sa Oriental Mindoro.
Naka-issue na rin ang arrest warrants laban sa kanya at sa ilang opisyal ng Sunwest, habang sinisikap ng gobyerno na kanselahin ang kanyang passport. RNT
