BAKU — Sinabi ng Australian police na ang dalawang lalaki na inakusahan sa Bondi Beach shooting ay kumilos mag-isa at hindi kabilang sa anumang militanteng cell.
Ayon sa awtoridad, pinatay nina Naveed Akram at ang kanyang ama na si Sajid Akram ang 15 katao sa isang Hanukkah event noong Disyembre 14, na siyang pinakamataong mass shooting sa Australia sa halos tatlong dekada.
Napag-alaman ng imbestigador na naglakbay ang mag-ama sa Mindanao, Pilipinas, noong Nobyembre, isang rehiyon na dati nang apektado ng militanteng aktibidad.
“There is no evidence to suggest these alleged offenders were part of a broader terrorist cell, or were directed by others to carry out an attack,” paglilinaw ni Australian Federal Police Commissioner Krissy Barrett.
Dagdag pa niya, walang indikasyon na nakatanggap sila ng pormal na pagsasanay o suporta sa operasyon sa Pilipinas.
Binigyang-diin ni Barrett na patuloy ang koordinasyon ng Australia at Pilipinas sa imbestigasyon.
Napatay si Sajid sa insidente, habang si Naveed ay nahaharap sa 59 kaso kabilang ang 15 counts ng murder at mga kaugnay na kasong terorismo. RNT
