MANILA, Philippines — Itinanggi ni Bicol SARO party-list Rep. Terry Ridon ang pahayag na nakatanggap ang ilang kongresista ng P2 milyon na “Christmas bonus” matapos aprubahan ang 2026 national budget.
Ayon sa kanya, bahagi ang pondo sa budget ng Lower House para sa maintenance at other operating expenses (MOOE), at hindi personal na bonus.
“Hindi totoo na may P2 million Christmas bonus. May mga ibinigay na kaperahan para sa mga opisina ng kongresista para sa mga aktibidad at mga programa at gawain na ginagawa ng mga kongresista. Ibig sabihin hindi iyan para perahin o para sa kapritso…Kasama sa listahan sa extraordinary miscellanous expenses na binibigay sa opisina. Hindi napupunta sa wallet o pitaka ng kongresista,” wika ni Ridon.
Binigyang-diin niya na regular ang pamamahagi ng MOOE at “still distributed whether or not you vote for the budget.”
Kinikumpirma rin ni House Deputy Speaker Ronaldo Puno, “It’s not a Christmas bonus. It is an additional funding for your Christmas requirements in your district. So, again, naka-record lahat yan. May COA naman dyan…”
Nauna nang inilahad ni Leandro Leviste na umano’y nakatanggap ang ilang kongresista ng P2 milyon cash pagkatapos aprubahan ang budget, na tinawag ni Ridon na “part of a pattern of lies and falsities.” RNT
