MANILA, Philippines – Pinuri ni OPAPRU Secretary Carlito Galvez Jr. ang Bangsamoro Parliament sa pagpasa ng bagong redistricting law, na mahalaga para sa unang regular parliamentary elections sa Bangsamoro Autonomous Region in Muslim Mindanao (BARMM) sa Marso 2026.
Ani Galvez, “The passage of a legally compliant redistricting law reflects the BTA’s resolve to uphold democratic principles, ensure inclusive representation, and realize the aspirations of our Bangsamoro brothers and sisters for self-governance.”
Ang Parliament Bill 415, na naipasa noong Enero 12 sa isang special session, ay nagtatakda ng 32 single-member parliamentary districts sa BARMM, na kailangan para makapagsimula ang Commission on Elections sa paghahanda ng halalan, alinsunod sa Bangsamoro Organic Law at direksyon ng Supreme Court.
Nagpasalamat si Galvez kay BARMM Chief Minister Abdulraof Macacua at Parliament Speaker Mohammad Yacob sa kanilang papel sa pagpasa ng batas.
Ayon sa kanya, ipinapakita ng aksyon ng Bangsamoro Transition Authority (BTA) ang kanilang determinasyon na tuparin ang political track ng Comprehensive Agreement on the Bangsamoro (CAB) at gampanan ang responsibilidad sa 4.5 milyong nasasakupan.
Ani Galvez, ang darating na halalan ay hindi lamang political exercise kundi pundasyon para sa kapayapaan, lehitimasyong pampulitika, at partisipasyon ng mamamayan sa BARMM.
“When citizens are empowered to elect their leaders, it reinforces trust in government institutions, strengthens the foundations of democratic governance, and embeds the principles of peace and unity in the fabric of society,” dagdag niya.
Binanggit din niya na ang pagpasa ng redistricting law ay patunay ng katatagan at determinasyon ng Bangsamoro sa pagtahak sa landas ng democratic self-governance, at isang hakbang patungo sa pangmatagalang kapayapaan, sustainable development, at political stability sa rehiyon. RNT/MND
