MANILA, Philippines – Nagpahayag ng pagkabigla si Interior Secretary Jonvic Remulla noong Huwebes matapos lumabas ang ulat na personal na nagpakita sa Sweden si dating kongresista Zaldy Co, na may nakabinbing warrant of arrest.
Ito ay matapos sinabi ni Remulla noong nakaraang linggo na pinaniniwalaang nasa loob si Co ng isang gated community sa Lisbon, Portugal.
“Nagulat nga kami. Kasi naman yung lugar nila gated community, madali tumakas rin doon eh kung magtatago ka sa kotse,” ani Remulla sa Unang Hirit.
Pansin ni Remulla, “borderless” ang mga bansa sa European Union kaya madali para kay Co ang maglakbay.
“So kung nakarating man siya sa Sweden, hindi ko pa nakikita kasi lahat yun kung verified yung apostille niya, sigurado yan by land, lumakbay siya papuntang Stockholm. This is probably a two-day drive kung pupunta siya roon o a day and a half by train,” dagdag niya.
Ayon sa eksklusibong ulat ni Joseph Morong ng GMA Integrated News, lumabas si Co sa Stockholm hindi bababa sa Enero 15, batay sa apostille na kalakip ng petisyon sa Korte Suprema.
Kinilala ni Remulla ang hirap ng intelligence operatives na subaybayan si Co dahil sa kanyang malaking resources at kakaunting tauhan.
“But nevertheless, ang Pangulo na nagsabi na gagawa na siya ng hakbang para kausapin ang Pangulo ng Portugal para ma-resolba na ito,” ani Remulla.
Ayon kay Remulla, walang negosasyon maliban kung ibabalik ni Co ang $1 bilyon na umano’y kaugnay ng katiwalian sa flood control fund.
“No deal. Isuli mo muna ang pera before we talk,” ani Remulla.
May nakabinbing warrant of arrest laban kay Co at iba pa, kabilang ang ilang opisyal ng Department of Public Works and Highways at direktor ng Sunwest Corp., kaugnay ng umano’y iregularidad sa mga flood control project.
Inihain ng Ombudsman ang kasong korapsyon at malversation laban kay Co at iba pa sa Sandiganbayan noong Nobyembre 18, 2025, kaugnay ng P289 milyong flood control project sa Oriental Mindoro. Itinanggi ni Co ang mga paratang. Santi Celario
