Mga sasakyang pababasbasan sa Manaoag Church nadaganan ng puno

MANILA, Philippines – Nadaganan ng puno ng acacia ang ilang sasakyan na pababasbasan sana sa Simbahan ng Manaoag, Pangasinan nitong Huwebes, Enero 29.

Ayon sa ulat, nabagsakan ng puno ang isang commuter van at brand new na SUV na matinding napuruhan, habang minor damages naman ang tinamo ng dalawa pang SUV.

Nakaparada sa parking lot ng Our Lady of Manaoag Minor Basilica ang mga sasakyan nang mabuwal ang malaking puno ng acacia na malapit sa Gate 5.

Nagtulong-tulong naman ang mga awtoridad na rumesponde sa insidente partikular ang mga tauhan ng Manaoag PNP, Bureau of Fire Protection, at Local Disaster Risk Reduction and Management Office.

Wala namang iniulat na nasaktan sa insidente.

Ang simbahan sa Manaoag ay itinuturing na “blessing capital” sa Northern Luzon dahil maraming mga may-ari ng sasakyan ang nagtutungo rito upang pabasbasan ang kanilang mga bagong sasakyan. RNT/JGC