MANILA, Philippines – Magkakaroon ng exclusion zones sa West Philippine Sea (WPS) kapag naisapinal ang live-fire exercises ng Pilipinas at ng treaty ally nito, kaugnay ng serye ng naval at air drills na nagsimula noong Enero 21 at tatagal hanggang Marso 31.
“Apart from the NOTAM (Notice to Airmen), the moment there will be live-fire exercises, exclusion zones will also be declared,” pahayag ni Rear Admiral Roy Vincent Trinidad, tagapagsalita ng Philippine Navy para sa WPS.
Ayon kay Trinidad, layon ng exclusion zones na pigilan ang pagpasok ng mga hindi awtorisadong barko at sasakyang panghimpapawid at tiyakin ang kaligtasan sa lugar ng ehersisyo. Ang lawak ng mga zone ay nakadepende sa aktibidad at sa uri ng sandatang gagamitin.
Sinabi rin niya na tanging modernong barko, eroplano, at sistema ng Armed Forces of the Philippines (AFP) ang gagamitin. “The activities that we will be conducting now cover modern warfare,” ani Trinidad.
Dagdag niya, saklaw ng NOTAM at Notice to Mariners ang mga ehersisyo na maayos na napagkasunduan at inaprubahan ng dalawang bansa. Bagama’t hindi pinangalanan ang treaty ally, ito ay tumutukoy sa Estados Unidos, na may Mutual Defense Treaty sa Pilipinas mula 1951.
Bagama’t tumutol ang China, iginiit ni Trinidad na ang mga ehersisyo ay nasa loob ng exclusive economic zone ng Pilipinas. “It covers Bajo de Masinloc. It is more than 600 nautical miles from mainland China. No provision of international law supports their claim or accusation,” aniya.
Tiniyak din ni Trinidad na magpapatuloy ang AFP sa tungkulin nitong ipagtanggol ang WPS. “(The) AFP will keep performing its mandate with our heads held high.” RNT/MND
