MANILA, Philippines – Iminungkahi ni Senate President Vicente Sotto III na isang beripikadong social media account lang bawat tao sa bawat platform upang mabawasan ang paglaganap ng internet trolls, lalo na kaugnay ng isyu sa West Philippine Sea.
Ayon kay Sotto, matagal na niyang iniisip ang panukala, bago pa magsimula ang 20th Congress.
“Dapat ang internet, whatever platform sa internet, kailangan one person, one account, ubos yung mga trolls. Di ba? O, paano nga natin gagawin yan? Kailangan yan. Coordinated with Facebook, Instagram, Twitter, TikTok. One person, one account, maliwanag. Pagka hindi verified, tanggal,” ani Sotto.
Binanggit din niya na pinag-aaralan ng Department of Information and Communications Technology (DICT) ang posibleng registration ng social media accounts, bagamat tinututulan ito ng ilang grupo dahil sa usapin ng privacy at free speech.
“Yan ang pinakamaganda. One person, one account,” dagdag pa niya. RNT/MND
