5-anyos utas sa iskul sa ligaw na bala

MANILA, Philippines – Patay ang isang limang taong gulang na kindergarten student matapos tamaan ng ligaw na bala pasado alas-8 ng umaga nitong Miyerkules sa loob ng silid-aralan sa Datu Piang, Maguindanao del Sur.

Ayon kay Police Capt. Steffi Salanguit, tagapagsalita ng Police Regional Office—Bangsamoro Region (PROBAR), nasa loob ng classroom ng Damabalas Elementary School ang bata nang tamaan ng ligaw na bala.

Batay sa salaysay ng class adviser sa mga pulis, bigla na lamang bumagsak ang biktima sa loob ng silid-aralan. Nang kaniyang lapitan at suriin, natuklasang tinamaan ito ng ligaw na bala.

Ayon sa PROBAR, nagkataon ang insidente kasabay ng patuloy na putukan sa pagitan ng mga armadong grupo sa karatig-barangay ng Olandang sa bayan ng Nabalawag, na sakop ng Special Geographic Area (SGA) ng Bangsamoro Region.

Nagpapatuloy ang imbestigasyon ng mga awtoridad. Mary Anne Sapico