MANILA, Philippines – Umakyat pa sa 54 ang bilang ng mga nasawi sa paglubog ng M/V Trisha Kerstin 3 sa Basilan matapos marekober ang isa pang bangkay sa underwater search operations nitong Sabado, Pebrero 14, ayon sa Philippine Coast Guard (PCG).
“The Philippine Coast Guard (PCG) technical divers commenced underwater operations today, February 14, 2026, in connection with the MV Trisha Kerstin 3 maritime incident. During the mission, one male cadaver was recovered from the wreck site,” iniulat ng PCG.
Dahil dito, mayroong 293 na nakaligtas at 25 indibidwal ang nananatiling nawawala.
Sinabi ng PCG na ang bilang ay pinagsama sa pamamagitan ng joint validation efforts ng Philippine National Police-Scene of the Crime Operatives (PNP-SOCO), City Disaster Risk Reduction and Management Office (CDRRMO), Coast Guard District Southwestern Mindanao (CGDSWM), at mga apektadong pamilya na patuloy na nakikipag-ugnayan sa interagency search and rescue authorities.
Samantala, naghain na ang Department of Transportation (DOTr) ng reklamo laban sa tatlong opisyal ng Maritime Industry Authority (MARINA) kaugnay sa paglubog ng barko.
Sa panayam nitong Biyernes, sinabi ni DOTr Assistant Secretary for the Maritime Sector Bong Plan na ang tatlong opisyal ng MARINA ay direktang sangkot sa pag-iisyu ng safety certificates sa M/V Trisha Kerstin 3.
Inilagay naman sa preventive suspension ang anim iba pang tauhan ng Philippine Coast Guard (PCG) habang nagsasagawa ng hiwalay na imbestigasyon ang PCG sa posibleng paglabag at dahilan ng paglubog ng barko.
Posibleng maipasa ang investigation report sa susunod na linggo. RNT/JGC
