ZURICH — Nagbitiw sa puwesto ang World Economic Forum (WEF) President at CEO na si Borge Brende nitong Huwebes, ilang linggo matapos maglunsad ang organisasyon ng isang independent review kaugnay ng kanyang ugnayan sa nahatulang sex offender na si Jeffrey Epstein.
Si Brende, na namuno sa Geneva-based forum mula pa noong 2017, ay nag-anunsyo ng pagbibitiw matapos lumabas ang mga dokumento mula sa US Justice Department na nagsasabing tatlong beses siyang nagkaroon ng business dinner kay Epstein at nakipagpalitan ng email at text message rito.
“After careful consideration, I have decided to step down as President and CEO of the World Economic Forum. My time here, spanning 8-1/2 years, has been profoundly rewarding,” pahayag ni Brende.
“I am grateful for the incredible collaboration with my colleagues, partners, and constituents, and I believe now is the right moment for the Forum to continue its important work without distractions,” dagdag niya. Hindi binanggit ni Brende si Epstein sa kanyang pahayag.
Sa hiwalay na statement, sinabi ng WEF co-chairs na sina Andre Hoffmann at Larry Fink na natapos na ang independent review na isinagawa ng external counsel at walang natuklasang karagdagang isyu maliban sa mga nauna nang naibunyag.
Itinalaga ng forum si Alois Zwinggi bilang interim president at CEO habang pinangangasiwaan ng Board of Trustees ang transition at ang paghahanap ng permanenteng kapalit. RNT
