MANILA, Philippines – Para masiguro na may disenteng tahanan ang pamilyang Pinoy, lalo na sa pagkakataong naging biktima ng sakuna, isinusulong ni Leyte Rep. Martin Romualdez ang pagbibigay ng gobyerno ng P3,500 monthly rental housing subsidy para sa mga “homeless” na Filipino.
Sa House Bill (HB) No. 7230 o “An Act Establishing a Rental Housing Subsidy Program for Informal Settler Families and Appropriating Funds Therefor” na inakda ni Romualdez at ni Tingog Party-list Rep. Jude Acidre, titiyakin na ang mga pamilyang nawalan ng tahanan dahil sa man-made o natural disaster ay mabibigyan ng agarang tulong habang wala pa ang relocation site na kanilang titirhan.
“Financial aid to low-income families or displaced individuals help afford decent housing in the rental market, acting as a flexible safety net when permanent solutions are not immediate. This gives better access to jobs/schools, and often serves as a bridge until permanent housing is available,” paliwanag ni Romualdez.
Sinabi naman ni Acidre na malinaw sa Saligang Batas na dapat mayroong tuloy-tuloy na programa ang pamahalaan para sa land reform at housing, at ang pagkakaroon ng subsidy para sa upa ay isang magandang daan para maalis agad ang mga naninirahan sa mga estero o sa ilalim ng mga tulay.
“Rental subsidy shall be granted to eligible beneficiaries until the date of completion of the permanent housing project intended for them. In case completion of the permanent housing project is delayed, the rental subsidy shall be extended, provided that the agency implementing the permanent housing project shall bear the cost of the extended financial assistance,” nakasaad sa panukala.
Sa ilalim ng panukala, P3,500 na subsidy ang ibibigay sa Metro Manila, habang sa mga lalawigan ay itatakda ito ng Department of Human Settlements and Urban Development (DHSUD).
Upang maging eligible sa subsidy, dapat makita ang rerentahang bahay at lilisanin na ang dating tinitirhan.
Inaatasan ang DHSUD na siyang bumalangkas ng implementing rules and regulations sa pagpapatupad ng panukala. Gail Mendoza
