MANILA, Philippines – Inaprubahan ng House Committee on Justice ang pagbawi sa ikalawang impeachment complaint na una nang inihain ni Tindig Pilipinas co-convener Francis Joseph Aquino Dee at inendorso nina ML Partylist Rep Leila de Lima at Akbayan Partylist Rep. Percival Cendaña.
Sa pagharap ni Dee sa impeachment hearing ay kinumpirma nito ang pagbawi sa kanilang inihaing impeachment complaint.
“On behalf of the 17 complainants of the second complaint, with me today are seven other complainants, I am confirming our intention to withdraw our impeachment complaint,” pahayag ni Dee.
Kasabay nito ay nagmosyon si Bukidnon Rep Jonathan Keith Flores, Vice Chairman ng House Committee on Justice na tanggapin at aprubahan ang pagwithdraw sa reklamo na kinatigan naman ni House Committee Chairman Gerville Luistro.
Sa panig nina de Lima at Cerdaña ay binawi na rin nila ang kanilang endorsement sa reklamo.
Matatandaan na sa isang liham ng grupo ni Dee sa komite ay sinabi nitong nagdesisyon sila na bawiin ang impeachment complaint na inihain noong Pebrero 2 upang mas matutukan na masuportahan ang ikatlong impeachment complaint na inihain naman ni Rev. Fr. Joel Saballa na para sa kanila ay parehas din sa kanilang alegasyon.
“We decided that withdrawal is the best course of action,” ani Dee.
Ang ikalawang impeachment complaint na binawi na ay inaakusahan si VP Duterte ng paglabag sa Konstitusyon, graft and corruption, bribery, unexplained wealth, gross incompetence at abuse of power, pagsang ayon sa extrajudicial killings at destabilization.
Samantala, ang ikatlong impeachment complaint na inihain ng mga pari, madre, abogado at civil society groups ay kaugnay naman sa P612 million confidential funds at korupsyon sa Office of the Vice President at Department of Education gayundin ang akusasuyon ng pagbabanta sa buhay nina Pagulong Ferdinand Bongbong Marcos Jr., First Lady Liza Araneta Marcos at dating House Speaker Martin Romualdez. Gail Mendoza
