MANILA, Philippines – Mahigpit na binalaan ni Senador Sherwin “Win” Gatchalian ang lahat ng oil companies laban sa profiteering o pagsasamantala sa kasalukuyang sitwasyon sa pagtatakda ng mas mahal na presyo ng produktong petrolyo.
Sa pahayag, nanawagan si Gatchalian sa Department of Energy (DOE) na higpitan ang pagbabantay sa mga retailer at oil companies laban sa posibleng profiteering o pananamantala sa presyo ng produktong petrolyo sa gitna ng tinatawag nitong “energy crisis” na sanhi tensyon sa Middle East.
Sinabi ni Energy Director Rino Abad na walang kontrol ang pamahalaan sa pagpepresyo ng mga produktong petrolyo dahil sa oil deregulation law kung saan walang direktang kontrol ang gobyerno sa presyo ng langis.
Ngunit hindi kumbinsido dito si Gatchalian lalo na’t naaabuso ang mga konsyumer,” ayon sa senador.
“Kaka-announce pa lang ng price increase sa world market pero ang ilang retailers ay nagtataas na agad ng presyo. Isa itong profiteering. Hindi sila pwedeng magtaas agad dahil ang hawak nilang stocks ay nabili sa mas mababang presyo. Dapat ibenta nila ito sa makatuwirang presyo,” pagdidiin ni Gatchalian, na vice chair ng Senate Committee on Energy.
Nauna nang sinabi ng DOE na may imbentaryo ang mga oil company na tumatagal ng humigit-kumulang 50 araw, kaya hindi dapat agad-agad magtaas ng pump prices ang mga ito.
Batay sa datos mula sa tanggapan ni Gatchalian, mula Enero hanggang Marso 4 ay tumaas ng 13.7% ang presyo ng gasoline sa P62 mula P55 kada litro. Nakapagtala naman ang diesel ng pagtaas na 41.4% sa P76 mula P54 kada litro, habang ang kerosene ay tumaas ng 43% sa mula P79 hanggang P114 kada litro. Ernie Reyes
