MANILA, Philippines – Pinangunahan ni Justice Secretary Fredderick A. Vida ang inisyatibo ng Department of Justice (DOJ) para sa operasyon ng bagong Regional Prosecution Office sa Cordillera Administrative Region (CAR) sa kanyang mga mahalagang pulong sa rehiyon noong Marso 24-25, 2026.
Batay sa Republic Act No. 10071 at Executive Order No. 220 (1987), layunin ng hakbang na ito na palakasin ang sistema ng hustisya sa Hilagang Luzon.
Kasama ni Secretary Vida sina Undersecretary Ian Norman Dato at Assistant Secretary Francis John Tejano, at nakipagpulong sila kay Baguio City Mayor Benjamin Magalong, Representative Mauricio Domogan, CAR OIC Regional Prosecutor Joy Marie Frances C. Cortez, at iba pang opisyal ng prosecution offices sa rehiyon.
“Ang pagtatatag ng Regional Prosecution Office sa CAR ay isang malaking pagbabago. Magdadala ito ng mabilis at madaling hustisya sa mga komunidad ng Cordillera, mababawasan ang mga pagkaantala sa resolusyon ng kaso, at mapapalakas ang koordinasyon natin sa mga lokal na lider at tagapagpatupad ng batas para sa mas ligtas na Hilagang Luzon,” ayon kay Secretary Vida.
Tinalakay sa mga pulong ang pag-secure ng permanenteng opisina, pagpapalakas ng koordinasyon sa lokal na pamahalaan at tagapagpatupad ng batas, pagpapabuti ng case management, pagsuporta sa mga saksi at biktima, at pagtugon sa pangangailangan sa tauhan at resources. Jocelyn Tabangcura-Domenden
