MANILA, Philippines – Inanunsyo ng Metropolitan Manila Development Authority (MMDA) na suspendido ang number coding scheme mula alas-12 ng tanghali ng Miyerkules Santo, Abril 1, hanggang Biyernes Santo, Abril 3.
“Planuhin ang biyahe at mag-ingat sa pagmamaneho,” saad sa abiso ng MMDA.
Samantala, sinimulan ng MMDA ang paghahanda para sa inaasahang Holy Week exodus ng mga tao pauwi ng probinsya.
Nitong Martes, inaprubahan ng MMDA at Metro Manila mayors ang exemption ng mga fuel truck at cargo truck na nagdadala ng essential goods sa number coding scheme at truck ban.
Ayon kay MMDA General Manager Undersecretary Nicolas Torre III, nasa 2,476 tauhan ang ipakakalat sa mga pangunahing kalsada, transportation hubs, at iba pang key areas sa Metro Manila sa Semana Santa.
“We will enforce a no day-off and no-absent policy for all traffic and field personnel when heavy traffic is expected due to the Holy Week exodus,” ani Torre. RNT/JGC
