TEHRAN, Iran – Nagbabala ang isang mataas na opisyal ng Iran laban sa posibleng ground invasion ng United States, na nagsabing “susunugin” ang mga tropang Amerikano kung manghihimasok ito sa kanilang teritoryo.
Ayon sa parliament speaker ng Iran na si Mohammad Bagher Qalibaf, handa ang Iran na harapin ang anumang puwersa ng Amerika at tutugon nang matindi laban sa mga sundalo nito at sa mga kaalyado ng Washington.
Kasabay nito, nagtipon sa Islamabad ang mga opisyal mula sa Saudi Arabia, Turkey, at Egypt upang subukang wakasan ang isang buwang digmaan—ngunit walang partisipasyon ang US at Israel.
Sa kabila ng mga usapang diplomatiko, nagpapatuloy ang palitan ng pag-atake ng US at Israel laban sa Iran, habang gumaganti naman ang Tehran gamit ang missiles at drones sa rehiyon.
Mahigit 3,000 katao na ang nasawi sa digmaan na nagsimula matapos ang pag-atake ng US at Israel sa Iran.
Patuloy rin ang pagtaas ng tensyon matapos magpadala ang US ng karagdagang libu-libong Marines at paratroopers sa rehiyon, kahit sinabi ni U.S. Secretary of State Marco Rubio na maaaring makamit ang layunin nang walang ground troops.
Samantala, pumasok na rin sa labanan ang grupong Houthis mula sa Yemen at naglunsad ng missile attacks laban sa mga target sa Israel.
Nagbabala rin ang Iran na maaaring targetin ang mga unibersidad ng Israel at US sa rehiyon kung magpapatuloy ang pag-atake sa kanilang mga paaralan.
Sa usapin ng kalakalan, bahagyang niluwagan ng Iran ang pagdaan ng ilang barko sa Strait of Hormuz, bagama’t nananatili itong kritikal sa suplay ng langis sa buong mundo.
Sa kabuuan, patuloy ang paglala ng sitwasyon habang walang malinaw na kasunduan sa kapayapaan at patuloy na tumataas ang bilang ng mga nasasawi sa iba’t ibang bansa sa rehiyon. RNT/MND
