MANILA, Philippines – Ipinasa ng Independent Commission for Infrastructure (ICI) sa Office of the Ombudsman ang mga luxury vehicles na isinuko ni dating Public Works and Highways engineer Brice Hernandez.
Kabilang sa mga isinurender na sasakyan ang isang black GMC Yukon Denali XL at isang navy blue Lamborghini Urus Performante.
Ayon sa ICI, isinuko ni Hernandez ang mga sasakyan noong Setyembre 2025.
“The Commission is hopeful that the turnover of these vehicles will further aid the OMB with its ongoing investigations,” ayon sa ICI.
Dagdag ng komisyon, bahagi ito ng mas malawak na imbestigasyon sa mga anomalya sa flood control projects at pagtulong sa restitution efforts pabor sa publiko.
Noong Marso, nauna nang isinuko ng ICI sa Ombudsman ang iba pang ebidensya at dokumento kaugnay ng naturang mga kaso.
Si Hernandez ay kinasuhan na ng graft at malversation kasama si dating Senador Ramon “Bong” Revilla Jr. at iba pa kaugnay ng umano’y P92.8-milyong ghost flood control project sa Pandi, Bulacan.
Kasalukuyang nakakulong si Hernandez sa New Quezon City Jail. RNT/MND
