MANILA, Philippines – Naghain ng resolusyon sa Senado si Sen. JV Ejercito para imbestigahan ang umano’y over-importation ng asukal sa bansa.
Sa Senate Resolution No. 369 na inihain nitong Huwebes, layunin nitong utusan ang Senate panel on Agriculture, Food, and Agrarian Reform na magsagawa ng imbestigasyon upang maprotektahan ang lokal na industriya ng asukal.
“Recent reports from industry stakeholders have raised concerns regarding the alleged mismanagement within the Sugar Regulatory Administration, over-importation of sugar, and the improper timing and overlapping of importation, which may adversely affect domestic producers,” ani Ejercito sa resolusyon.
Ayon sa kanya, ang Sugar Regulatory Administration ay attached agency ng Department of Agriculture na may tungkuling itaguyod ang industriya ng asukal sa bansa.
Giit ni Ejercito, ang maling timing ng importasyon ay nagdulot umano ng oversupply sa merkado, pagbaba ng farmgate prices, at pagbawas ng kita ng mga magsasaka at manggagawa sa asukal.
Batay sa resolusyon, umabot na sa 668,405 metric tons ang sugar stocks noong Marso 2026—mas mataas ng halos 100,000 metric tons kumpara sa 568,871 metric tons noong kaparehong panahon noong 2025.
Ayon sa senador, indikasyon ito ng pagdami ng supply na maaaring naapektuhan ng importasyon.
“There is a need to review existing policies and the basis for determining the timing and volume of sugar importation to ensure that such policies remain responsive to present challenges and promote long-term stability,” dagdag pa niya. RNT/MND
