MANILA, Philippines – Malapit nang umusad ang review ng Senate committee on ethics and privileges sa mga reklamo laban sa ilang senador matapos pumirma ang 6 sa 10 miyembro nito sa rules ng komite.
Kinumpirma ni Sen. JV Ejercito, na siyang namumuno sa panel, nitong Huwebes na napirmahan na ang rules ng komite noong Miyerkules.
“The committee can soon discharge its functions, including the evaluation of complaints and the conduct of hearings. We will proceed as soon as the rules are published,” ani Ejercito.
Ayon sa kanya, maaari nang magsimula ang komite sa pagtanggap at pagdinig ng mga reklamo kapag nailathala na ang mga rules.
Kabilang sa mga pumirma ang Senate President Pro Tempore Sen. Panfilo Lacson, Majority Leader Sen. Migz Zubiri, at sina Ejercito, Kiko Pangilinan, Erwin Tulfo, at Risa Hontiveros.
“We have been awaiting the completion of the required six signatures since our last meeting in March, and we thank our colleagues for their support,” dagdag ni Ejercito.
Hindi naman lumagda sina Senate Minority Leader Alan Peter Cayetano at mga minority senators na sina Christopher “Bong” Go, Imee Marcos, at Rodante Marcoleta.
Ayon kay Ejercito, ilalathala ang rules sa Biyernes bago ganap na magampanan ng ethics panel ang kanilang tungkulin.
Nakatakda ring magpulong ang komite sa Abril 28 para repasuhin ang mga nakabinbing reklamo para sa compliance sa form at substance.
Isa sa mga reklamo ay laban kay Sen. Bato dela Rosa kaugnay ng umano’y absenteeism.
Ayon sa ulat, hindi na nakadalo si dela Rosa sa Senado mula Nobyembre 11, 2025 at nakapagtala na ng 31 absences sa 58 session days mula simula ng 20th Congress. RNT/MND
