CEBU, Philippines – Kinumpirma ng Department of Environment and Natural Resources–Environmental Management Bureau (DENR-EMB) Region 7 na aprubado na ang lahat ng corrective measures na ginawa ng Monterrazas de Cebu sa Barangay Guadalupe, Cebu City.
Ayon sa ahensya, ang pagpapatuloy ng proyekto ay batay sa dokumentadong remedial works, compliance milestones, at pagbabayad ng penalties kaugnay ng paglabag sa Environmental Compliance Certificate (ECC) sa ilalim ng Presidential Decree 1586.
Ayon sa DENR-EMB 7, “The stoppage was lifted on the basis of documented remedial works, compliance milestones and settlement of penalties imposed under PD 1586, for violation of ECC Conditions.”
Ibinahagi rin ng ahensya na ang proyekto ay may 23 detention ponds na kayang maglaman ng humigit-kumulang 52,468 cubic meters ng tubig. Layunin nito na kontrolin ang surface runoff, bawasan ang biglaang daloy ng tubig-baha, at protektahan ang mga downstream communities.
Sa isinagawang inspeksyon, nakita ang pond excavation, embankment stabilization, inlet at outlet control structures, sediment traps, at erosion-control measures tulad ng vegetative cover.
Sinabi rin ng DENR-EMB 7 na patuloy nilang mino-monitor ang proyekto para matiyak ang pangmatagalang bisa ng mga flood control measures, at hinihikayat ang publiko na mag-report ng anumang problema sa drainage o baha.
Samantala, pinahintulutan na rin ng developer na Mont Property Group Inc. ang pagpapatuloy ng konstruksyon matapos alisin ang cease-and-desist order.
Sa gitna nito, muling nagsalita ang celebrity engineer na si Slater Young, na nagsabing dumaan sa matinding kritisismo ang kanyang pamilya matapos ang Bagyong Tino.
Ipinunto niya ang isang pag-aaral ng UP Institute of Environmental Science and Meteorology na nagsasabing hindi ang proyekto ang sanhi ng baha.
Ayon sa kanya, “We did not just meet the required standard for water management, we almost doubled it. Because of that, our detention pond and held back up to 99.74 per cent of the excess rain water coming off our site.”
Giit pa ni Young, kailangan ng Cebu ng “real solutions” sa pagbaha na nakabatay sa tamang pagtukoy ng ugat ng problema, at sinabi niyang mananatiling bahagi ang Monterrazas sa paghahanap ng solusyon. RNT/MND
