MANILA, Philippines — Nagpahayag ng pasasalamat si Executive Secretary Ralph Recto nitong Huwebes kina dating opisyal ng pamahalaan na sina Eduardo Año at Carlito Galvez Jr. para sa kanilang serbisyo sa ilalim ng administrasyong Marcos at sa mga nakaraang tungkulin sa gobyerno.
Si Año, dating National Security Adviser, at si Galvez, dating Presidential Adviser on Peace, Reconciliation and Unity, ay kamakailan lamang nagretiro sa serbisyo publiko dahil sa personal na dahilan.
Si Año ay miyembro ng Philippine Military Academy Class 1983 at nagsilbing chief of staff ng Armed Forces of the Philippines mula 2016 hanggang 2017, at naging Interior Secretary sa administrasyon ni dating Pangulong Rodrigo Duterte. Si Galvez naman ay mula sa PMA Class 1985 at nagsilbing AFP chief mula Abril hanggang Disyembre 2018.
“Across decades in both military and civilian roles, they went above and beyond the call of duty in keeping the peace, securing the state, and serving the Filipino people,” pahayag ni Recto.
Kasabay nito, tinanggap din ni Recto ang pagtatalaga kina NSA Eduardo Oban Jr. at OPAPRU Secretary Mel Senen Sarmiento bilang kapalit ng mga nagretiro, at tinawag silang mga karapat-dapat na humalili sa tungkulin.
“Both bring deep experience in government, sound judgment, and a firm grasp of the challenges we face—all of which will prove invaluable as they carry forward the work entrusted to them,” dagdag ni Recto.
Ayon pa sa kanya, matitiyak na magpapatuloy ang gawain ng pamahalaan sa pangangalaga sa seguridad ng bansa at ng mamamayan sa ilalim ng bagong pamunuan. RNT
