MANILA, Philippines — Nanatiling nangungunang napupusuan bilang susunod na pangulo si Vice President Sara Duterte para sa 2028 national elections, sa kabila ng mga impeachment complaint na kinakaharap niya, batay sa survey ng OCTA Research para sa unang kwarto ng 2026.
Nakakuha si Duterte ng 33 porsiyento bilang “best leader” para sa susunod na pangulo, bahagyang mas mababa kumpara sa 38 porsiyento noong huling kwarto ng 2025. Isinagawa ang survey sa 1,200 rehistradong botante mula Marso 19 hanggang 25, na may ±3 porsiyentong margin of error sa 95 porsiyentong antas ng confidence.
Kasalukuyang nahaharap si Duterte sa impeachment complaints kaugnay ng umano’y maling paggamit ng confidential funds at umano’y planong pagpatay laban kina Pangulong Ferdinand Marcos Jr., Unang Ginang Liza Araneta-Marcos, at dating House Speaker Martin Romualdez. Iniulat din ng Anti-Money Laundering Council sa pagdinig ng House Committee on Justice na nakatanggap ito ng mga ulat ng “suspicious” at “covered” bank transactions na umaabot sa ₱6.77 bilyon na umano’y konektado kay Duterte at sa kanyang asawa sa loob ng halos dalawang dekada.
Pumangalawa si dating bise presidente at Naga City Mayor Leni Robredo na may 21 porsiyento, mula sa 8 porsiyento noong nakaraang quarter. Dahil dito, lumiit ang agwat nila ni Duterte mula 30 percentage points noong nakaraang taon tungo sa 12 puntos sa unang bahagi ng 2026. Ayon sa OCTA, ang pag-angat ni Robredo ang pangunahing dahilan ng pagbabago, habang ang pagbaba ni Duterte ay malapit sa margin of error ng survey.
Una nang sinabi ni Robredo na wala siyang planong tumakbo sa pambansang posisyon sa 2028 at maaaring tumakbong muli bilang alkalde ng Naga City.
Pumangatlo si Manila City Mayor Isko Moreno na may 10 porsiyento, kasunod sina Sen. Raffy Tulfo na may 9 porsiyento at Sen. Bam Aquino na may 4 porsiyento. RNT
