MANILA, Philippines – Tiwala si House Committee on Public Accounts Chairman at Bicol Saro Party-list Rep. Terry Ridon na makukuha ng Kamara ang kinakailangang one-third na boto upang pormal na ma-impeach si Vice President Sara Duterte at maakyat ang kaso sa Senado.
Sa ginanap na Saturday News Forum, sinabi ni Ridon na hindi magiging mahirap makuha ang target na 106 na boto mula sa mahigit 300 miyembro ng Kamara, lalo at nagkakaisa ang Committee on Justice sa naunang botohan nito.
“‘Yung boto ng probable cause 53 votes na po yun. So ang kailangan lang naman po namin 106 votes to impeach. Tingin ko naman, that is a number that will not be difficult to surmount at makuha,” ani Ridon na miyembro ng Justice panel.
Ayon kay Ridon, aaprubahan ng komite ngayong Lunes ang committee report na naglalaman ng Articles of Impeachment at inaasahan niyang sisimulan ang debate sa plenaryo sa loob ng susunod na dalawang linggo bago ito tuluyang i-transmit sa Senado.
Pagkatapos pa ng botohan sa plenaryo pormal na bubuuin ang prosecution panel, lumulutang na ang mga pangalan nina Reps. Gerville Luistro, Lorenz Defensor, Ysabel Maria Zamora, Rodge Gutierrez, Jonathan Keith Flores, Joel Chua, Chel Diokno, Leila De Lima, Marcelino Libanan, at Lordan Suan bilang mga posibleng taga-usig. Gail Mendoza
