MANILA – Nanawagan ang isang mambabatas sa Kongreso na imbestigahan ang umano’y pagdami ng mga “digital blackmail outfits” na nagpapanggap bilang media organizations o political commentary platforms, kasunod ng mga babala na ginagamit na ang social media para sa pananakot, pamimilit, at umano’y pangingikil.
Sa isang privilege speech noong Martes, sinabi ni Rep. Jude Acidre, chair ng House Committee on Higher and Technical Education, na maghahain siya ng resolusyon para sa imbestigasyon in aid of legislation hinggil sa umano’y extortion activities ng ilang online political operators at influencers.
Ikinonekta ni Acidre ang isyu sa ulat ng pagkakaaresto sa founder ng Peanut Gallery Media Network (PGMN) at iba pa sa isang entrapment operation ng National Bureau of Investigation.
Kaugnay ito ng umano’y hinihinging PHP300 milyong kapalit kapalit ng hindi paglalabas ng mapanirang online content laban sa dating House Speaker at Leyte 1st District Rep. Ferdinand Martin Romualdez.
Ayon kay Acidre, mas malawak ang isyu at banta ito sa demokratikong diskurso at sa mismong pamamahayag.
“When a group allegedly prepares damaging material, holds it back, and demands money in exchange for not releasing it, that is not journalism, that is alleged extortion,” aniya.
Nagbabala rin siya na may mga online network na umanong naging “digital blackmail outfits” na gumagamit ng coordinated attacks, reputational damage, at viral accusations para sa pera o impluwensiyang politikal.
“A journalist investigates to inform the public. An extortionist threatens to profit from fear,” dagdag niya.
Giit pa ni Acidre, ang pagkalabo ng hangganan ng journalism at digital political operations ay sumisira sa tiwala ng publiko sa media.
“They make citizens ask whether exposés are done for truth or for payment,” aniya.
Sinabi rin niyang layunin ng kanyang panukalang imbestigasyon na alamin kung dapat bang patawan ng pamantayan ng katotohanan, pananagutan, at transparency ang mga online personality at digital media operators.
“This is not about silencing criticism. This is about separating criticism from criminal coercion,” diin niya.
Nanawagan din siya ng mas mahigpit na hakbang laban sa coordinated online harassment, manipulation, impersonation, at umano’y extortion schemes sa social media.
“Social media must never become a marketplace where reputations are held hostage for money. Let us choose journalism over blackmail. Let us choose democracy over digital lawlessness,” dagdag niya. RNT
