MANILA, Philippines – Inaprubahan ng Senado noong Martes ang panukalang palawakin ang financial support para sa mga estudyante ng kolehiyo at technical-vocational sa pamamagitan ng pagpapalakas ng implementasyon ng free tertiary education law ng bansa.
Sa botong 21-0-0, ipinasa ang Senate Bill No. 1894 na layong amyendahan ang Republic Act No. 10931 o ang “Universal Access to Quality Tertiary Education Act.”
Sa pangangasiwa ni Senate President Pro Tempore Loren Legarda, pinalalawak ng panukala ang saklaw ng Tertiary Education Subsidy (TES) at nagdaragdag ng suporta para sa mga estudyanteng kabilang sa disadvantaged sectors.
Awtomatikong makakakuha ng TES grants ang mga nagtapos ng senior high school mula sa mga pamilyang nasa ilalim ng Pantawid Pamilyang Pilipino Program (4Ps) kapag sila ay natanggap sa mga paaralang kinikilala ng Commission on Higher Education o ng Technical Education and Skills Development Authority.
Pinalalawak din ng panukala ang depinisyon ng disadvantaged learners na kinabibilangan ng persons with disabilities, indigenous peoples, solo parents at kanilang mga dependents, children under foster care, learners in conflict with the law, first-generation college students, at mga mula sa geographically isolated and disadvantaged areas.
Sasaklawin din ng TES ang gastusin sa transportasyon, libro, dormitoryo o tirahan, laptop o computer, disability-related expenses, at licensure examination fees. Magkakaroon din ng karagdagang suporta ang nursing at allied health students sa pribadong institusyon para sa clinical internship at related learning experience (RLE) fees.
Ayon kay Legarda, layunin ng panukala na tugunan ang kakulangan sa umiiral na student assistance programs.
“EDCOM 2 revealed stark gaps in the implementation of student assistance programs. Many of our most vulnerable learners continue to struggle with the rising cost of transportation, food, housing, and school requirements despite existing support mechanisms,” aniya.
Dagdag pa niya, titiyakin ng panukala na maitutok ang limitadong pondo ng gobyerno sa mga estudyanteng higit na nangangailangan.
“Ang edukasyon ay hindi lang dapat libre, dapat ito’y makabuluhan at nagbubunga ng tunay na oportunidad, mula enrollment hanggang graduation at trabaho,” aniya.
Sinabi rin niya na layunin ng panukala na iparating sa mahihirap na estudyante na “the government stands behind their dreams.” Naipasa na rin sa House of Representatives ang kaparehong bersyon ng panukala. RNT
