MANILA, Philippines – Nagkaisa ang 41 mambabatas mula sa iba’t-ibang partido sa Kamara para ihain ang House Resolution (HR) No. 1006 na naglalayong magsagawa ng malalimang imbestigasyon hinggil sa robbery extortion activities ng Peanut Gallery Media Network (PGMN).
Ang hakbang ay kasunod ng mga pangamba na ginagamit ang mga online platform para sa intimidasyon, coercion, disinformation, at pangongolekta ng pera sa ilalim ng pagkukunwari bilang media o public commentary.
Natanggap ng House Bills and Index Service ang nasabing resolusyon na humihiling sa House Committees on Public Order and Safety, Information and Communications Technology, at Public Information na suriin ang usapin.
Ayon kay Tingog Party-list Rep. Jude Acidre, na siyang naghatid ng privilege speech bago ang paghahain ng resolusyon na malayo sa tunay na pamamahayag ang ginagawa ng PGMN.
“When a group allegedly prepares damaging material, holds it back and demands money in exchange for not releasing it, that is not journalism. That is extortion,” ani Acidre.
“Kaisa tayo ng bansa sa pagpapahalaga sa malayang panamahayag. But PGMN is far from practicing real journalism. This resolution intends to expose PGMN’s alleged extortion activities and unmask it as a mere fake news peddler,” dagdag ng mambabatas.
Kasama ni Acidre sa pag-akda ng resolusyon ang mga kinatawan mula sa Lakas-Christian Muslim Democrats (CMD), National Unity Party (NUP), at Party-list bloc, kabilang sina Reps. Yedda Marie Romualdez, Jude Acidre, Marcelino Libanan, at marami pang iba.
Nag-ugat ang hiling na probe matapos maaresto ang founder ng PGMN na si Franco Mabanta at ilang kasamahan nito sa isang entrapment operation ng National Bureau of Investigation (NBI) dahil sa P300M extortion attempt laban kay dating House Speaker Martin Romualdez.
Nakasaad sa resolusyon na bagamat protektado ng Konstitusyon ang malayang pagpapahayag, hindi ito dapat maging pananggalang sa mga krimen.
“While freedom of speech and of the press are protected constitutional rights, these freedoms do not shield acts that may constitute robbery, extortion, grave threats, coercion, cybercrime, or other unlawful conduct,” ayon sa mga mambabatas.
Layon din ng imbestigasyon na busisiin kung sumusunod ang PGMN sa mga batas sa registration, taxation, online monetization, at digital platform activities.
Inaasahang ipatatawag ng mga komite ang mga opisyal ng PGMN, content creators, mga testigo, law enforcement officers, at mga kinatawan mula sa Department of Justice (DOJ), NBI, PNP-Anti-Cybercrime Group, at Bureau of Internal Revenue (BIR).
Target ng Kamara na makabuo ng mga bagong batas at regulasyon para mapatibay ang depensa laban sa robbery extortion, cyber-enabled coercion, organized harassment, and disinformation habang pinoprotektahan ang mga lehitimong mamamahayag at whistleblowers. Gail Mendoza
