MANILA, Philippines – Kinumpirma ni House Secretary General Cheloy Garafil na matagumpay at naging maayos ang paglilipat ng Articles of Impeachment patungong Senado kagabi, sa kabila ng naging kaganapan sa Senado.
Sa isang opisyal na pahayag, binigyang-diin ni Garafil na nanatiling nakatutok ang Kamara sa pagtupad ng kanilang tungkulin sa ilalim ng Konstitusyon nang may professionalism.
“The transmittal of the Articles of Impeachment to the Senate last night was completed successfully and in an orderly manner despite the many developments unfolding simultaneously,” ani Garafil.
Ayon kay Garafil, hindi tumigil ang mga tauhan ng House Secretariat sa pagtatrabaho upang masigurong tama ang lahat ng dokumento bago ang opisyal na transmittal.
Eksaktong alas-7:22 ng gabi nang opisyal na matanggap ng Senado ang mga dokumento, ilang sandali bago ang naganap na tensyon at ulat ng pamamaril kaugnay ng planong pag-aresto kay Sen. Ronald “Bato” dela Rosa.
“Our personnel worked continuously to ensure the proper reproduction, verification, collation, and official transmission of the documents. Every step was undertaken with utmost care because the integrity and accuracy of the submission are paramount,” paliwanag nito.
Naghanda ang Kamara ng 27 printed copies ng Committee Report No. 261 (House Resolution No. 989) at 27 flash drives na naglalaman ng electronic copies ng impeachment articles.
Sa pagtatapos ng transmittal, inaasahan na ang Senado ay magko-convene bilang isang Impeachment Court upang pormal na simulan ang paglilitis sa ikalawang impeachment case laban kay Duterte. Gail Mendoza
