Lumahok ang mga tauhan mula sa ilang ahensya ng gobyerno na pinamumunuan ng Civil Aviation Authority of the Philippines, sa Philippine
Full-Scale Search and Rescue Exercise (SAREX) sa Dolomite Beach nitong Mayo 15, 2026. ERIC OCAPAN
MANILA, Philippines – Matagumpay na naisagawa ng Civil Aviation Authority of the Philippines (CAAP) ang Philippine Search and Rescue Exercise (SAREX) 2026 sa Dolomite Beach, Maynila.
Sinimulan ang full-scale exercise alas-8 ng umaga, kung saan sinubok ang kakayahan ng rescue units sa simulated aircraft ditching incident sa Manila Bay.
Ayon sa scenario, isang commercial aircraft mula Busuanga patungong NAIA ang nagkaroon ng technical problem at napilitang mag-emergency water landing.
Agad na ikinasa ng rescue teams ang retrieval, evacuation, at medical response operations tulad ng water rescue, stretcher evacuation, at first aid.
Ipinakita rin ang koordinasyon ng air, sea, at land rescue units para sa mabilis na operasyon.
Lumahok ang Philippine Coast Guard, Philippine Red Cross, Manila DRRMO, Philippine Air Force, Philippine Navy, BFP, at iba pang ahensya. Dumalo rin sa aktibidad ang mga opisyal ng CAAP at aviation sector, kabilang sina Transportation Undersecretary Jim Sydiongco at Assistant Secretary Donaldo Mendoza.
Ayon sa CAAP, naging matagumpay ang aktibidad dahil sa maayos na inter-agency coordination at mabilis na response capabilities. Jocelyn Tabangcura-Domenden
