MANILA, Philippines – Tumestigo ang engineer ng Department of Public Works and Highways (DPWH) nitong Miyerkules, Mayo 20, na ang P92.8 milyong flood control project sa Pandi, Bulacan na subject ng malversation case laban kay dating senador Ramon Bong Revilla Jr., at anim na iba pa, na sinertipikahang kumpleto sa kabila ng kakulangan ng construction materials testing report.
Sinabi ni DPWH Bulacan First District Engineering Office (DEO) Quality Assurance Section chief Ferdinand Vergara Jr. sa Sandiganbayan Third Division na dapat siniguro ng materials engineer at project engineer na ang construction materials testing report ay nakalagay sa progress report ng proyekto bago pirmahan sa pagbabayad.
“Wala pong naka-attach na [construction materials] test result. Sa DO (Department Order) 11, dapat po may test report,” sagot ni Vergara sa tanong ni Sandiganbayan Third Division chairperson at Associate Justice Karl Miranda.
Ani Vergara, sa oras na mailabas na ang construction materials test result ay susuriin naman ito ng materials engineer, at ng project engineer, hanggang sa makarating sa hepe ng konstruksyon.
Ang project engineer para sa P92.8 milyong halaga ng proyekto sa Pandi, Bulacan ay si Engineer Arjay Domasig, habang ang materials engineer ay si Engr. Emelita Juat.
Sina Domasig at Juat ay co-accused ni Revilla sa malversation case.
Idinagdag ni Vergara na wala ring due diligence sa konstruksyon ng flood control project.
“Dapat kumpleto po lahat ng requirements. Dapat sine-secure po nila na andun iyong test report bago pumirma,” aniya.
Kabilang sa iba pang co-accused sa kaso ni Revilla ay sina:
former DPWH Bulacan First DEO Assistant District Engr. Brice Hernandez, former DPWH First DEO Assistant District Engineer Jaypee Mendoza, former DPWH First DEO finance section chief Juanito Mendoza, at former DPWH Bulacan First DEO Engineering Office cashier Christina Pineda. RNT/JGC
