MANILA, Philippines – Daan-daang mga pekeng produkto ng mga pampalasa sa pagkain ang nakumpiska at naaresto ang tatlong kalalakihan sa isinagawang buy-bust operation ng Northern Police District (NPD)sa isang bodega,napaulat sa Caloocan City.
Batay sa report na ipinarating ni Northern Police District (NPD) Acting Director P/BGen. Benliner Capili kay National Capital Region Police Office (NCRPO) Director P/MGen. Anthony Aberin, ang nasabing police operation ay nag ugat makaraang makatanggap sila ng impormasyon na nagbebenta ng mga pekeng produkto ng pampalasa ang isang bodega na matatagpuan sa Corregidor St., sakop ng Brgy. 63.
Dahil dito, alas 8:00 ng gabi nang subukan ng pulisya na magpanggap na buyer sa nasabing bodega at iabot ang P100,000 marked money kapalit ng 60 kahon ng mga pekeng pampalasa at doon naaresto ang tatlong suspek.
Nakumpiska rin ng pulisya at ng mga kinatawan ng pribadong kompanyang gumagawa ng seasoning products, ang karagdagang 317 kahon ng kahalindulad din ng pekeng produkto sa bodega ng mga naaresto.
Sinabi ni P/MGen. Aberin na hindi biro ang panganib na dala ng pekeng produkto sa kalusugan ng publiko, pati na rin sa posibleng pagkawala ng tiwala ng mga consumers sa naturang mga produkto.
Sasampahan ng pulisya ng reklamong paglabag sa Republic Act 8293, o ang Intellectual Property Code of the Philippines ang mga naarestong suspek sa Caloocan City Prosecutor’s Office. (Merly Duero)
