MANILA, Philippines – Ipinagtanggol ni Senador Francis “Chiz” Escudero ang posisyon nitong tumalon sa bakod ni acting Senate President Pro-Tempore Sherwin Gatchalian kaya nagkaroon ng 12 simple majority bilang quorum sa pagbubukas at pagsasara ng sesyon nitong Miyerkoles.
Sa kanyang pahayag, sinabi ni Escudero, dating senate president na pinatalsik ng grupo ni dating Senate President Vicente Sotto III na “ang kasalukuyang deadlock sa Senado ay hindi na katanggap-tanggap at hindi maaaring panindigan.”
“When political divisions become too extreme and obstruct our mandate, we must all have the courage to pause, gain perspective, reflect, consider and realize that we should put the Senate, as the institution that we serve, above ourselves,” ayon kay Escudero.
Sinabi ni Escudero na hindi kontes pulitikal ang pangyayari, hindi pumapanig kaninong grupo, kundi tumitindig para sa Senado.
“Hindi ito usaping pampulitika. Wala akong sinasamahan o iniiwanang grupo, pangkat o paksyon. Hindi ko sinasabi na may mali o tama o may nagkulang o nagmalabis kaninuman. Ngunit hindi pwedeng manatili tayo sa ganitong sitwasyon. Ang naaapektuhan na ay ang mismong kakayahan ng Senado na gampanan ang kaniyang tungkulin sa bayan,” ayon kay Escudero.
“Ito ang rason at dahilan ng aking pasya ngayong araw na ito. Hinihiling ko ang inyong pag-unawa sa amin, kasabay ng inyong panalangin para sa inyong Senado na malampasan ang hamon na ito at patuloy na magampanan namin ang aming tungkulin sa inyo at sa sambayanan,” dagdag ng senador.
Kasabay nito, nagpahayag naman ng malalim na pagpapasalamat si kasalukuyang Senate Majority Leader Juan Miguel Zubiri kay Escudero saka kinomendahan ang kanyang tapang at paninindigan na pumunta sa plenaryo at harapin ang isyu na kinahaharap ng institusiyon.
“His action sent a clear message: that his commitment to the country, to the Senate, and to the Constitution would prevail above all else,” ayon sa joint statement ng grupo ni Gatchalian na binasa ni Zubiri.
“His presence enabled the Senate to proceed with the discussion of matters that are too important to be left unresolved and too consequential to be set aside,” ayon kay Zubiri.
Ipinagtanggol din ni Zubiri ang isyu ng quorum na hindi naman “uncharted matter.”
“The Supreme Court, in Avelino v. Cuenco, recognized the principle that a quorum of 12 is determined based on the number of members who are legally able to discharge the functions of the Senate,” ayon kay Zubiri.
Aniya, may nangyaring ganito noon sa Senado, partikular noong 2015, na kinilala ng Senado ang 12 senador na nasa sakop ng kanilang hurisdiksiyon.
“The Senate continued to perform its constitutional duties because the work of government could not be placed on hold,” ayon kay Zubiri.
“At a time when the nation faces pressing challenges, the Filipino people expect their Senate to work, deliberate, and fulfill its constitutional mandate. The institution cannot remain stalled by disagreements or uncertainty. Our duty is clear: to legislate, provide oversight, and serve the public interest,” giit pa ng senador.
Giit pa ni Zubiri na: “The Filipino people deserve a Senate that shows up, does its job, and places public service above politics.”
“It is time for the Senate to move forward and get back to work for the Filipino people,” ayon kay Zubiri. Ernie Reyes
