MANILA, Philippines – Nagmartsa sa Mendiola ang mga miyembro at tagasuporta ng Bangsamoro Government para magsagawa ng malawakang peace rally na nanawagan sa pambansang pamahalaan na lubos na ipatupad ang mga makasaysayang peace agreement.
Pinangunahan ng Save Bangsamoro Movement, isinagawa ang demonstrasyon sa ilalim ng temang “Move for Peace Now!” o “Kilos para sa Kapayapaan, Ngayon Na!”
Ang pangunahing layunin ng pagkilos ay pilitin ang administrasyon na igalang ang lahat ng probisyon na nakasaad sa Comprehensive Agreement on the Bangsamoro o CAB at sa Bangsamoro Organic Law o BOL.
Direktang nanawagan ang mga protesta kay Pangulong Ferdinand Marcos Jr., at hiniling na pormal na ibalik ang pamunuan ng Bangsamoro Autonomous Region in Muslim Mindanao o BARMM sa Moro Islamic Liberation Front o MILF.
Partikular na hinihingi ng kilusan ang muling pagtalaga kay MILF Chairman Al Haj Murad Ebrahim bilang Interim Chief Minister ng rehiyon.
Bukod sa panawagan para sa pamunuan ng rehiyon, naglabas din ng mga hinaing tungkol sa pamamahala ang mga demonstrador at nanawagan ng agarang pagbibitiw ni Special Assistant to the President o SAP na si Antonio Lagdameo Jr. Inakusahan ng grupo ang opisyal ng gabinete na umano’y labis na nakikialam sa panloob na pamamahala ng rehiyong Bangsamoro.
Tinapos ng mga organizer ang demonstrasyon sa sama-samang panawagan para sa pagkakaisa, at inilarawan ang pagkilos bilang mapayapang hakbang tungo sa pangmatagalang katatagan at regional autonomy. Jocelyn Tabangcura-Domenden
