MANILA, Philippines — Pinarangalan ni Manila Mayor Francisco “Isko Moreno” Domagoso noong Lunes ang mga natatanging barangay sa lungsod at hinikayat ang mga opisyal na patuloy na pagbutihin ang kanilang serbisyo sa publiko sa pamamagitan ng konkretong resulta at epektibong pamamahala.
Sa ginanap na pagkilala sa mga outstanding barangay mula sa anim na distrito ng Maynila, pinuri ni Domagoso ang mga barangay officials dahil sa kanilang mahalagang ambag sa pagpapaunlad ng kani-kanilang komunidad.
Ayon sa alkalde, hindi maiiwasan ang pagkakaiba-iba ng opinyon at personal na interes sa anumang organisasyon, ngunit ang pinakamahalaga ay ang resulta ng kanilang paglilingkod.
“Walang perpektong organisasyon, maging sa barangay man o sa pamahalaang lungsod. Palaging may pagkakaiba ng pananaw, ngunit ang tunay na sukatan ng serbisyo ay ang nagagawa para sa mamamayan,” ani Yorme Isko.
Binigyang-diin din niya na mas pinahahalagahan ng mga residente ang mga programang kanilang napapakinabangan kaysa sa mga isyung pulitikal at batikos na ibinabato sa mga opisyal.
“Ang mahalaga ay ang resulta. Maaaring makarinig ang mga tao ng mga kritisismo, ngunit kapag nakita nila ang mga proyektong naipatupad at serbisyong natanggap nila, iyon ang kanilang natatandaan,” dagdag pa niya.
Sinabi ni Domagoso na ang tagumpay ng isang barangay ay nasasalamin sa kalidad ng serbisyong naihahatid nito sa mga residente at sa mga konkretong pagbabagong nararamdaman ng komunidad.
Kasabay nito, tiniyak ng alkalde ang patuloy na suporta ng pamahalaang lungsod sa mga barangay sa pamamagitan ng mga pondo at programang magpapalakas sa pamamahala sa grassroots level.
Sa naturang programa, inanunsyo rin ni Domagoso na nilagdaan na niya ang pagpapalabas ng P127 milyong pondo para sa unang quarter ng Revenue Participation Program (RPP) para sa mga barangay ng Maynila.
Ayon sa alkalde, makatutulong ang naturang pondo sa pagpapatupad ng mga lokal na programa, pampublikong serbisyo at mga proyektong pangkomunidad sa 896 barangay ng lungsod.
Hinimok din niya ang mga barangay officials na gamitin nang maayos ang mga pondong ipinagkakaloob at manatiling nakatuon sa epektibong paglilingkod sa kanilang mga nasasakupan.
Itinampok sa seremonya ang mga barangay na nagpakita ng kahusayan sa pamamahala, paghahatid ng serbisyo publiko at pagpapatupad ng mga programang pangkomunidad, bilang pagkilala sa kanilang mahalagang papel sa pagsusulong ng mga layunin ng pamahalaang lungsod para sa kaunlaran ng Maynila.
“Bilang mga lider, tungkulin nating maghatid ng resulta. Sa huli, ang mahalaga ay kung paano natin napabuti ang buhay ng mga taong ating pinaglilingkuran,” ani Domagoso. JAY Reyes
