MANILA, Philippines — Isinusulong ng House prosecution panel ang paggamit ng Filipino at pagsasalin ng mga kaganapan sa impeachment trial ni Vice President Sara Duterte sa mga pangunahing rehiyonal na wika upang mas madaling maunawaan ng publiko ang mga pagdinig.
Ayon kay lead prosecutor at House Committee on Justice chairperson Rep. Gerville “Jinky Bitrics” Luistro, pormal nilang ihahain ang mungkahi sa Senate impeachment court sa nakatakdang pretrial conference sa Hunyo 18.
“I wish to formalize as well on this upcoming pre-trial conference, the possibility of us, the prosecutors, and even the defense, to use Filipino language when the same is possible,” ani Luistro.
Bagama’t aminado siyang may ilang legal at teknikal na termino na mahirap isalin, sinabi niyang mahalagang maging malinaw at madaling maunawaan ng karaniwang mamamayan ang mga pagdinig.
“It is our intention na lahat ng mangyayari (all developments) during the impeachment trial should be understandable on the part of the ordinary Filipinos,” aniya.
Dagdag ni Luistro, pinag-aaralan din ng prosekusyon ang pagsasalin ng mga development sa iba’t ibang pangunahing rehiyonal na wika upang mas maraming Pilipino ang makasubaybay sa kaso.
Samantala, sinabi ni House impeachment spokesperson at Lanao del Sur Rep. Zia Alonto Adiong na nakikipag-ugnayan na sila sa communications team upang maipaliwanag nang mas malinaw sa publiko ang mga usapin, ebidensiya, at argumento na ihaharap sa impeachment court.
Nakatakdang idaos ang pretrial conference ng Senate impeachment court sa Hunyo 18, habang magsisimula naman ang paglilitis sa Hulyo 6. RNT
