Sen. Win pormal nang nahalal bilang Senate President; Sotto, bagong Pro Tempore

MANILA, Philippines – Pormal nang nahalal si Senador Sherwin Gatchalian bilang bagong Senate president nitong Miyerkules, na nagtapos sa dalawang linggong sigalot sa liderato ng Senado laban kay Senador Alan Peter Cayetano.

Sa isinagawang special session, si Senador Juan Miguel Zubiri ang nagmungkahi kay Gatchalian para sa pinakamataas na posisyon sa Senado.

Ayon kay Senador Francis Pangilinan, nagkaisang bumoto ang 13 senador na dumalo sa sesyon pabor kay Gatchalian.

Idineklara ang quorum matapos dumalo ang 13 senador, kabilang sina Senador Francis “Chiz” Escudero at Senador Joel Villanueva na dating kabilang sa grupo ni Cayetano.

Nauna nang kinilala ni Cayetano na wala na siyang sapat na bilang ng suporta upang manatili bilang Senate president.

Samantala, nahalal naman si Senador Vicente “Tito” Sotto III bilang Senate President Pro Tempore matapos siyang imungkahi ni Senador Panfilo “Ping” Lacson at suportahan ng lahat ng senador na dumalo sa plenaryo.

Nanumpa si Sotto sa harap ni Gatchalian, na siya ring nangasiwa sa panunumpa ni Zubiri bilang bagong Senate majority leader.

Nagpulong ang Senado sa isang special session alinsunod sa direktiba ni Pangulong Ferdinand “Bongbong” Marcos Jr. upang talakayin ang mga prayoridad na panukala ng pamahalaan. RNT