DOLE, pinagbabayad ng higit P11-M may-ari at contractor ng gumuhong gusali sa Pampanga

MANILA, Philippines — Inatasan ng Department of Labor and Employment (DOLE) ang may-ari at contractor ng gumuhong gusali sa Angeles City, Pampanga na magbayad ng mahigit P11 milyon kaugnay ng mga paglabag sa karapatan ng mga manggagawa at sa insidenteng ikinasawi ng nasa 30 katao.

Sa Kapihan sa Manila Bay, sinabi ni Labor Secretary Francis Tolentino na kabuuang P1,102,798.50 ang dapat bayaran sa 57 construction workers bilang hindi naibigay na sahod sa panahon ng work stoppage order, kakulangan sa pasahod, hindi nabayarang rest day premium, at holiday pay.

Ayon sa kalihim, may 10 araw ang mga respondent upang bayaran ang naturang halaga. Kapag nabigo silang sumunod, magsasagawa ng legal na hakbang upang maipatupad ang kautusan.

Bukod dito, pinagmumulta rin ng DOLE ang may-ari ng gusali ng P10.324 milyon alinsunod sa Department Order No. 252, Series of 2025.

Sinabi ni Tolentino na resulta ito ng isinagawang imbestigasyon ng ahensya sa insidente ng pagguho ng gusali sa Pampanga.

Dagdag niya, ipapasa sa mga kaukulang ahensya ang resulta ng imbestigasyon para sa posibleng administratibo, kriminal, at sibil na kaso laban sa mga responsable.

Nilinaw rin ng kalihim na patuloy pang pinag-aaralan ang posibleng pananagutang sibil bilang danyos para sa mga nasawing manggagawa at iba pang biktima ng trahedya. Jocelyn Tabangcura-Domenden