MANILA, Philippines — Nagkasundo ang bagong mayorya sa Senado na italaga si Senate President Francis “Chiz” Escudero bilang presiding officer ng impeachment trial ni Vice President Sara Duterte.
Ayon kay Sen. Panfilo “Ping” Lacson, pormal na pagtitibayin ang pagtatalaga kay Escudero kapag muling nagpulong bilang impeachment court ang Senado sa Hulyo 6.
“As per our consensus as of this morning, we will elect Sen. Chiz Escudero if we convene again as the impeachment court to be the presiding officer,” ani Lacson.
Sinabi ni Lacson na si Senate President Pro Tempore Sherwin Gatchalian ang nagmungkahi kay Escudero at sinuportahan ito ng mayorya, bagamat maaari pa aniyang magbago ang napagkasunduan.
Ayon pa kay Lacson, napili si Escudero dahil abogado ito at may karanasan sa mga impeachment proceedings.
“No, we discussed it among ourselves just to keep things smooth,” tugon ni Lacson sa mga haka-hakang may kaugnayan ito sa paglipat ni Escudero sa bagong mayorya sa Senado.
Dati umanong kaalyado si Escudero ng grupo ni dating Senate President Alan Peter Cayetano bago ang pagbabago sa liderato ng Senado noong Hunyo 3.
Samantala, kinumpirma ni Majority Leader Juan Miguel Zubiri na tinanggihan ni Escudero ang alok na maging Senate president pro tempore.
“He [Escudero] was the first choice,” ani Zubiri.
Sa halip, si Sen. Vicente “Tito” Sotto III ang nahalal sa ikalawang pinakamataas na posisyon sa Senado. RNT
