MANILA, Philippines – Inanunsyo ng Armed Forces of the Philippines (AFP) na matagumpay na naisagawa ng mga puwersang pandagat at panghimpapawid ng Pilipinas at Estados Unidos ang kanilang ikaapat na bilateral Maritime Cooperative Activity (MCA) sa West Philippine Sea (WPS) ngayong taon.
Isinagawa ang aktibidad mula Hunyo 14 hanggang 19 sa pakikipagtulungan ng AFP at ng US Pacific Command (USPACOM).
Kabilang sa mga ipinadalang asset ng Pilipinas ang BRP Diego Silang (FFG-7), AW-109 helicopter, FA-50 fighter aircraft, C-208B aircraft, at Sokol helicopters. Nag-deploy din ang Philippine Coast Guard ng BRP Melchora Aquino (MRRV-9702) at BRP Sindangan (MRRV-4407).
Samantala, nagpadala ang Estados Unidos ng USCGC Charles Moulthrope (WPC-1141), USCGC Emlen Tunnell (WPC-1145), isang P-8A Poseidon maritime patrol aircraft, at mga tauhan ng 3rd Marine Littoral Regiment.
Sa loob ng anim na araw, nagsagawa ang mga kalahok ng iba’t ibang maritime interoperability exercises gaya ng search and rescue, visit-board-search-and-seizure operations, communication exercises, tactical maneuvers, photo exercise, at joint fires rehearsal.
Ayon sa AFP, ipinapakita ng matagumpay na MCA ang matibay na kooperasyon ng Pilipinas at Estados Unidos sa pagpapalakas ng maritime security, maritime domain awareness, at pagsuporta sa rules-based international order sa Indo-Pacific region. RNT/MND
