GENERAL SANTOS, Philippines – Nanatiling suspendido nitong Martes ang lahat ng klase sa mga pampublikong elementarya at mataas na paaralan sa General Santos City matapos ang magnitude 6.2 na lindol na tumama sa lungsod noong Hunyo 15.
Ang lindol ay isa sa mga aftershock ng malakas na magnitude 7.8 na lindol noong Hunyo 8 na yumanig sa Soccsksargen Region at nagdulot ng matinding pinsala sa General Santos City at Glan.
Ayon kay Schools Division Superintendent na si Isagani dela Cruz, mananatiling suspendido ang mga klase hanggang sa susunod na abiso habang isinasagawa ang panibagong pagsusuri sa kaligtasan ng mga gusali ng paaralan.
Pansamantala ring ipinatupad ang work-from-home setup para sa mga kawani ng division office at mga paaralan. Samantala, ang mga estudyante ay sasailalim muna sa asynchronous learning hanggang ideklarang ligtas ang mga silid-aralan at iba pang pasilidad.
Inatasan din ni dela Cruz ang mga paaralan na tiyaking halos lahat ng mag-aaral at kawani ay sumailalim sa Psychological First Aid (PFA) bago bumalik sa normal na klase upang matulungan silang makabangon mula sa epekto ng lindol.
Patuloy namang magre-report nang personal ang mga miyembro ng disaster response teams at iba pang mahahalagang tauhan sa mga ligtas na pansamantalang lugar ng trabaho habang nagpapatuloy ang mga inspeksiyon at recovery efforts. RNT/MND
