MANILA, Philippines – Naghain ng reklamo ang National Bureau of Investigation-National Capital Region laban kay dating congressman Mike Defensor at anim iba pa sa qualified human trafficking.
Ang reklamo ay inihain ng NBI-NCR sa Pasig Prosecutor’s Office.
Kabilang sa mga respondent sa reklamo ang asawa ni Defensor na si Julie Rose Defensor.
Bukod sa qualified human trafficking, itinuturo rin ng reklamo ang mga respondent sa mga hakbang na nagpopromote ng trafficking in persons at paggamit ng trafficked persons.
Matatandaan na nilusob ng mga ahente ng NBI ang Chicago KTV Bar sa Pasig City noong Abril at nasagip ang 54 babae sa operasyon.
Ayon kay NBI Director Melvin Matibag, si Defensor ang chairman ng Cliffpoint Development, na nagpapatakbo sa Cliffpoint Square kung saan matatagpuan ang ni-raid na KTV.
Si Defensor ay may hawak ng 65% ng Pax Libera Mining, na hawak naman ng 72.96% ng Cliffpoint. RNT/JGC
