MANILA, Philippines – Iginiit ng Philippine National Police (PNP) na dapat pare-parehong igalang ng lahat ang batas kasunod ng mga isinagawang rally ng Iglesia ni Cristo (INC) sa Metro Manila nitong Martes.
Ayon sa PNP, mahalagang sundin ang mga legal na kinakailangan sa mga pampublikong pagtitipon, kabilang ang pagkuha ng permit kung kinakailangan, upang mapanatili ang kaayusan at kaligtasan ng publiko.
Inamin naman ng National Capital Region Police Office (NCRPO) na nabigla sila sa biglaang pagtitipon dahil wala itong permit at wala ring paunang abiso, kaya hindi sila nakapaghanda nang maayos. Gayunman, pinayagan nilang magpatuloy ang rally basta’t mapanatili ang kapayapaan at kaayusan, alinsunod sa direktiba ng Department of the Interior and Local Government.
Ayon sa NCRPO, kung naging magulo ang pagtitipon, agad sana itong pinahinto.
Samantala, apat na katao ang naaresto sa rally. Kabilang dito ang isang bus driver na umano’y nakabangga ng pulis, isang nagprotesta na umano’y nanuntok ng pulis, at dalawa pa dahil sa magulong asal. Tatlong pulis naman ang nasugatan, kabilang ang dalawang sangkot sa mga insidente at isa na nakaranas ng matinding pagkapagod.
Tinatayang 10,000 katao ang nagtipon sa paligid ng EDSA People Power Monument at White Plains Avenue hanggang alas-10 ng umaga, ayon sa Quezon City Police District. RNT/MDS
