MANILA, Philippines – Sinabi ni Vice President Sara Duterte na ang mga taong nagtipon sa EDSA ay nagpapakita ng lumalaking sentimyento laban sa administrasyon ni Pangulong Ferdinand Marcos Jr.
Ayon kay Duterte, hindi umano natutugunan ng pamahalaan ang mga pangunahing problema ng bansa tulad ng mataas na presyo ng bilihin, kawalan ng katiyakan sa trabaho, at pagtaas ng gastusin. Iginiit din niya na sa halip na magbigay ng solusyon, pinipili umano ng administrasyon na patahimikin ang mga kritiko sa ngalan ng pananagutan.
Ang pahayag ni Duterte ay kasunod ng pagtitipon ng libu-libong miyembro ng Iglesia ni Cristo (INC) sa EDSA. Ayon sa INC, tinututulan nila ang umano’y “selective justice” at “distortion of law” kaugnay ng planong pagsasampa ng kasong plunder laban kay Sen. Rodante Marcoleta.
Sinabi rin ni Duterte na ang mga nagtatanong tungkol sa umano’y korapsyon sa Malacañang, pumupuna sa pamahalaan, o naglalabas ng mga alegasyon laban sa Pangulo ay tila pinipigilan, na aniya ay nagdudulot ng pangamba sa malayang pagpapahayag at pananagutan ng pamahalaan.
Dagdag pa niya, ang isyu ay hindi na lamang usaping pulitika kundi tungkol sa dangal ng Estado at kinabukasan ng mga Pilipinong nahaharap sa kahirapang pang-ekonomiya habang umano’y napipigilan ang kanilang mga boses.
Si Duterte ay kasalukuyang nahaharap sa impeachment matapos siyang akusahan ng Kamara ng pagbabanta laban sa Pangulo at First Lady, hindi maipaliwanag na yaman, at maling paggamit ng confidential funds. Magsisimula ang kanyang impeachment trial sa Senado sa Hulyo 6. RNT/MDS
