MANILA, Philippines – Posibleng maharap sa kasong grave coercion ang retiradong Navy Rear Admiral matapos umanong tutukan ng baril ang isang driver na nagparada sa harap ng kanyang bahay.
Lumabas ang usapin sa pagdinig ng Senado matapos mag-viral ang video kung saan makikitang ikinasa ni Punzalan ang baril at minura ang driver.
Ayon kay Mandaluyong Police chief PCol. Reynan Patam, pinag-aaralan na ang pagsasampa ng kasong grave coercion laban sa dating Rear Admiral na si Ramon Punzalan.
Sinabi rin ni Patam na batay sa paunang beripikasyon ng Regional Civil Security Unit-National Capital Region (RCSU-NCR), wala umanong License to Own and Possess Firearms (LTOPF) si Punzalan at wala ring nakarehistrong baril sa kanyang pangalan.
Aniya, “We have requested from RCSU NCR (Regional Civil Security Unit National Capital Region) and initially, sir, General Punzalan does not have an LTOPF (License to Own and Possess Firearms) and he does not have any firearms recorded.”
Dagdag pa niya, “We’re doing case buildup for the illegal possession of firearms.”
Si Punzalan ay dating chairman at CEO ng Philippine Military Academy Alumni Association, Inc. at nagtapos sa Philippine Military Academy noong 1976. RNT/MDS
