MANILA, Philippines – Umaasa si Davao City Rep. Paolo Duterte na mangingibabaw ang katotohanan at hustisya sa pormal na pag-uumpisa ng impeachment trial laban sa kanyang kapatid na si Vice President Sara Duterte.
Sa isang opisyal na pahayag, nakiusap ang mambabatas sa publiko na magkaroon ng “open mind” at iwasan ang mga espekulasyon habang umuusad ang makasaysayang paglilitis sa Senado.
“Like many Filipinos, I hope the proceedings will be conducted fairly, professionally, and without unnecessary distractions,” ani Rep. Duterte.
Binigyang-diin pa ng nakatatandang kapatid ng Bise Presidente na ito na ang tamang pagkakataon upang salain ang mga lumulutang na akusasyon laban sa ikalawang pangulo na ilang buwan nang bumabalot sa bansa.
“More importantly, I hope this process finally allows the truth to emerge from the mountain of accusations, speculation, political narratives, and noise that have surrounded this issue for months,” dagdag pa nito.
Aniya, karapatan ng bawat Pilipino na malaman ang katotohanang nakabatay sa solidong ebidensya at hindi sa maruruming kuwento ng politika.
“The Filipino people deserve facts, not rumors. Evidence, not innuendo. Truth, not propaganda.” Giit nito.
Kumpiyansa rin ang mambabatas na handang harapin ni VP Sara ang mga reklamo laban sa kanya sa tamang proseso at umapela din ito na hayaan ang Senate impeachment court na gampanan ang kanilang mandato nang walang kinatatakutan o kinikilingan.
“At the end of the day, political attacks may generate headlines, but only the truth can stand the test of scrutiny. We remain hopeful that this trial will not only settle the issues being raised but also expose the motivations behind them,” dagdag pa nito.
Sa huli, nag-iwan ng hamon si Rep. Duterte sa magkabilang panig na hayaang ang mga ebidensya ang magsalita: “Let the evidence speak. Let the facts prevail. Let the truth come out.” Gail Mendoza
